Relatos con premio!

Escribir ao xeito ten premio na nosa biblioteca! Vai alá un mes desde que lanzamos o certame de relato curto polo Día Internacional dos Dereitos Humanos, e a pesar das dificultades das últimas semanas por causa da Covid, o noso alumnado animouse a crear varios relatos coa axuda do profesorado de linguas. Desde o dereito a vivir en paz, pasando polo acceso a educación ou a emigrar na procura dunha vida digna, os textos recibidos foron un pretexto para pararse a pensar e decatarse de que o lugar de nacemento pode condicionar a vida dunha persoa. A reflexión está feita e o certame xa ten gañador e gañadora. Velaquí o alumnado afortunado:

Categoría A (1º e 2º ESO): Marcos González

Categoría B (3º e 4º ESO): Paula Carril

Parabéns! Que disfrutedes do voso premio no comercio local de Camariñas! 

"Aos quatro ventos" Leitura Expansiva Intercentros

Como vén sendo habitual, a Biblioteca Escolar colabora co ENDLG, Equipo de Normalización e Dinamización da Lingua Galega, en traballos educativos arredor do día das Letras Galegas. Nesta ocasión, por causa da Covid19, foi difícil celebralo como era costume. Con todo, desde o IES Pedra da Aguia, sumámonos á última iniciativa escolar do ano Carvalho participando nun proxecto intercentros promovido desde os institutos do Milladoiro e Burela. A idea foi ler fragmentos dos múltiples xéneros cultivados polo autor, que apostou na ortografía reintegrada para o galego que falamos, abrindo as súas posibilidades comunicativas a toda a Lusofonía.

O noso alumnado púxolle voz a poemas como Sabela, contundencia a textos de A xente da Barreira, a que foi a primeira novela galega da posguerra, e moita solvencia a fragmentos do Scórpio que deron para falar un pouco sobre a nosa lingua.

Se premes AQUÍ poderás ver e escoitar o resultado do noso contributo a este proxecto colectivo.

Parabéns polas boas lecturas e participación!

     

Lecturas demoradas para alumnado rápido!

Tes probado a ler as lecturas recomendadas nas materias de Galego e Castelán con tempo? Non esperes ao final e lembra que as vacacións poden ser un bo momento para levares estes e outros titulos a casa. Ler con calma presta máis!

Na Biblio dispoñemos de exemplares suficientes e unha outra opción pode ser a través da plataforma GaliciaLe. Só precisas asociarte á Biblioteca Municipal para obter o teu carné alí tamén! Despois, é tan fácil como acceder e descargar o título que desexes en formato dixital.

Das lecturas programadas para a 2ª avaliación, encontrarás as seguintes en Lingua Galega:

1º ESO: O neno inverno de María Canosa

2ºESO: Escarlatina, a cociñeira defunta de Ledicia Costas

4ºESO: A cabeza de Medusa de Marilar Aleixandre

... E en Lingua Castelá:

3ºESO: El Conde Lucanor de Don Juan Manuel (Nota: non é a versión escolar)

4ºESO: Don Juan Tenorio de J. Zorrilla  (Nota: non é a versión escolar)

Unha biblioteca nunha mochila! As mochilas viaxeiras

Seis son as mochilas viaxeiras preparadas para pasar o nadal nas casas do noso alumnado de 1ºe 2ºESO. Desta volta serán máis de quince días para disfrutar en familia dunha escolla de filmes, documentais, poesía, literatura multilingüe, atlas e moito contido de artes variadas e coñecemento interesantísimo! Difícil será que nas vosas casas non encontredes algún título do voso gusto... 

Lembrade a enquisa que vai no interior para seguir mellorando os fondos da nosa Biblioteca Escolar e non esquezades tirar moitas fotos dos mellores momentos da experiencia coa que montaremos unha reportaxe. Fainos moita ilusión!

E para os que non fostes rápid@s abondo, habilitaremos novas quendas quincenais á volta das vacacións!  

Inscríbete na biblio!

Decembro, Dereitos Humanos

Decembro é o mes que marca o final de ano e tamén unha data moi significativa no calendario de celebracións. O día 10 está dedicado a conmemorar a Declaración Universal dos Dereitos Humanos, para lembrarnos que todos e todas nacemos libres e iguais e que aínda son moitos os millóns de persoas no mundo con dereitos elementais sen ser repectados. Esta realidade fai moi necesario educar para conseguir os Obxectivos 2030 do Desenvolvemento Sustentable definidos pola ONU.

Xunto co Certame Literario de Relato Curto, para sensibilizar ao noso alumnado ao respecto, programamos desde os clubs de lectura nas sesións deste mes, títulos onde a infancia e xuventude enfrenta situacións de inxustiza e de violación dos Dereitos Humanos.

O club de 1ºESO, traballou o título Cuando Hitler robó el conejo rosa de Judith Kerr, para falar sobre a brutalidade dos conflitos, a infancia perdida e os desprazados de guerra. Valéndose dun xogo de rol de ACNUR, o alumnado simulou as circunstancias vitais que viven millóns de refuxiados no mundo.

O club de 2ºESO, leu O neno do pixama a raias de John Boyne, xa un clásico das bibliotecas escolares, para abordar o tema da discriminación, a intolerancia e o respecto polo diferente, procurando fotografía de colección Getty que sorprendeu a máis dun. Xa por último, o club de 3ºESO, escolleu o libro Chamando ás portas do ceo de Jordi Sierra i Fabra, para dar a coñecer o traballo dunha cooperante nun contexto complexo como a India. 

Deixamos as ligazón ás sesións do club hipervinculadas nos títulos dos libros para saber como se desenvolveron eses momentos!