O NOSO FARO VILÁN

80 anos de "Sitio de Interese Nacional "

Como ben sabemos todos nós o noso faro do Cabo Vilán é un dos máis fermosos do "mundo mundial". Porque nos sentimos orgullosos del puxémoslle o seu nome a este blog da nosa biblioteca e chamámoslles Araos ao nosos clubes de lectura, pois os araos viven nos cantís sobre os que se asenta o faro.

O faro Vilán é o faro eléctrico máis antigo de España (1896) e presenta a singularidade de ter unha torre octogonal de 25 m de altura que está separada do edificio  e situada a unha altura de 100 m sobre o nivel do mar. A comunicación entre o edificio e a torre ten lugar percorrendo un túnel construido sobre as rochas. O faro primitivo luciu por primeira vez no ano 1854. O novo foi proxectado en 1860, pero non empezaría a construirse ata 1891 despois do naufraxio do Serpent en novembro de 1890.

O enclave do faro  foi declarado de Sitio de Interese Nacional no ano 1933, hai agora 80 anos, por iso a Asociación de Empresarios de Camariñas está organizando unhas actividades moi interesantes e estrea unha web que podedes visitar picando neste enlace http://farovilan.com/

NELSON MANDELA, MORRE "EN PAZ"

Nelson Mandela (1918 - 2013). Coñecido no seu país, Sudáfrica, como Madiba, foi un político e avogado surafricano. Foi presidente da República de Sudáfrica de 1994 a 1999. Antes de estar preso fora líder de Umkhonto we Sizwe, o brazo armado do Congreso Nacional Africano. En 1962 foi arrestado e condeado a cadea perpetua e liberado, despois de máis de 27 no cárcere, en febreiro de 1990. Desde a súa liberación traballou sempre por superar o racismo e lograr a conciliación entre negros e blancos.Mandela traballou co entón presidente de Sudáfrica, Frederik Willem de Klerk, para conseguir unha democracia multirracial en Sudáfrica, cousa que se conseguiu en 1994. Polo seu traballo en conxunto, tanto Mandela como de Klerk recibiron o Premio Nobel da Paz de 1993. Posteriormente Mandela gañou as eleccións e foi presidente de Sudáfrica. A súa última aparición pública foi o 11 de xullo de 2010 na final do Campionato Mundial de fútbol de Sudáfrica 2010. Faleceu na súa casa de Johannesburgo o pasado xoves día 5 de decembro. Descanse EN PAZ.
Varios músicos lle dedicaron cancións. Esta que vos deixo neste vídeo foi composta por Jerry Dammer, do grupo inglés The Specials, cando estaba nol cárcere, pedindo a súa liberdade e foi interpretada por numerosos músicos que se uniron á petición en todo o mundo.

SESIÓN CONTINUA

Os Araos andan en sesión continua, como naqueles tempos nos que nos cines podías ver dúas películas, unha a continuación da outra, coa mesma entrada. Desta volta foi algo distinto. Primeiro os Araos vimos na biblioteca a primeira parte de "Los juegos del hambre" e logo, xa na sala de cine de Cee, a segunda parte "En llamas".  Sentímolo moito polos Araos que non puideron asistir, por mor dun super-mega-ultra exame que os deixou sen cine, mágoa! Perderon tamén a oportunidade de probar a estupenda tarta que degustamos na primeira sesión (seica había alguén de "cumple"..., grazas, Lupe e compañía) e a tanda de flocos de millo (palomitas) na segunda. Total, que quedamos con moitas ganas de ver o desenlace da peli e que os libros segundo e terceiro da triloxía non teñen descanso nos andeis esta tempada. Repetirase no curso esta coincidencia de lectura e peli? Estarían dispostos os Araos a "sacrificarse" de novo? Que a sorte estea sempre da vosa parte!

Sesión Contínua on PhotoPeach

25 de novembro

Día Internacional  contra a violencia de xénero

PERIGOSO RETROCESO
Ao mellor moit@s credes que o machismo é cousa do pasado, pero estudos recentes demostran que o machismo está medrando entre @s adolescentes:

Un 10,5% das mozas de 14 a 19 anos recoñecen que foron maltratadas polos seus noivos, un 6,2% din verse obrigadas a prácticas sexuais que non desexaban, un 14,6% foron ameazadas polas súas parellas até sentir medo e un 23,2% foron insultadas e ridiculizadas.

Un 36,3% pensa que os celos son unha expresión de amor, o 11,7% dos mozos cren que está ben que os homes saian con moitas mozas, pero non ao revés. Unha de cada catro mozas afirma que o seu noivo a controla a través do móbil. Hai moitas formas de facelo: “envíame un WhatsApp cando chegues”,”faime unha videochamada”, “pon o localizador”…

Un consello: Non dar as claves de acceso ás redes e non enviar fotos que, cando a relación se torce, poden ser mal utilizadas.

CIENCIA CURIOSA

CIENCIA SABROSA

Rematamos estes días a exposición (e algo máis) sobre Ciencia que fixemos aproveitando o lema deste ano nas Bibliotecas Escolares: Ler ciencia na biblioteca escolar. Da man de Xaquín, o profe de Naturais, puidemos ver uns cantos libros da biblio nos que ler ciencia e, sobre todo, uns cantos exemplares "curiosos" que permitiron un achegamento máis divertido á Ciencia, e tamén algún exemplar "dos tempos de Maricastaña", é dicir, dos tempos nosos como alumnos. Foi unha boa forma de ver como cambiaron, por sorte, os libros e as bibliotecas,

Por outra banda, como non só de ler se vive, tamén houbo un grupo que puxo en práctica aquelo de que a experiencia é a nai da ciencia e marcharon ao monte, guíados pola man expertísima de Manuel Pose, autor de auténticas "enciclopedias" sobre os cogomelos (e xa, que pena, ex-pai de alumna: un bico grande, Laura) para localizar e catalogar os cogomelos que podemos atopar na nosa zona. Gracias, Manolo, por tan boa disposición. Tomámosche a palabra para futuras colaboracións, que sabemos que os teus saberes non se limitan a un só campo.

Ler ciencia na biblio - presentacion imagenes