Certame de relato curto: día Internacional dos Dereitos Humanos 2020

Este mes de decembro dedicaremos boa parte do noso traballo a visibilizar a importancia dos Dereitos Humanos. Tomaremos como pretexto a celebración internacional no día 11, para tomar conciencia das desigualdades presentes no mundo actual e reflexionar sobre o papel da cidadanía no ámbito local e global.

Deste xeito, a proposta enmárcase tamén nunha liña de traballo desta biblioteca arredor dos ODS 2030, os Obxectivos para o Desenvolvemento Sustentable acordados pola ONU.

Neste sentido, unha das nosas actividades vai ser o Certame de Relato Curto aberto a todo o alumnado do centro, de 1º a 4º ESO, como unha oportunidade para promover a a creación literaria.

Esta será unha colaboración cos Departamentos de Lingua Galega e Lingua Castelá, que contará con dous premios para os mellores relatos.

Preme nas BASES para saberes máis!  

Envía o teu relato ao enderezo da Biblioteca Escolar: biblioteca.ies.pedradaaguia@gmail.com

POR CAUSA DA SITUACIÓN SANITARIA o prazo de entrega adíase ata o 22

 de decembro e o fallo do xurado ata o 8 de xaneiro!

Inauguramos as nosas Lecturas ao Vivo!

 

Neste curso 20-21 imos apostar por un novo formato de lectura co alumnado. Faremos lecturas en voz alta, compartidas e dirixidas. Isto, que non é nada novo en educación, é unha aposta por recuperarmos un espazo máis para a lectura vivida en comunidade. Chamámolo Lecturas ao Vivo e comeza como unha colaboración entre o departamento de Xeografía e Historia e a Biblioteca Escolar que aspiramos a espallar a outras áreas de coñecemento.

As lecturas programadas servirán para afondar en temas complementarios ás materias nun formato descontraído e participativo. Arrancamos desta volta con títulos como A revolta dos animais de G. Orwell, Nómades de Xosé Tomás, La vuelta al mundo de un forro polar rojo de Wolfang Korn e Soy un punto de Giancarlo Macrí e Carolina Zanotti.

As lecturas serán dirixidas pola profesora da materia durante as sesións de aula ao longo do curso. Deste xeito, traballaremos tamén os ODS 2030, os Obxectivos para o Desenvolvemento Sustentable, acordados pola ONU co obxectivo de promover unha educaión para a cidadanía global.

Outubro: lecturas contra a violencia

Remata o mes de outubro, un tempo para reflectirmos sobre a importancia da educación para facer frente á violencia, en calquera das súas expresións. Co 25N no horizonte, os clubs de lectura da nosa Biblioteca Escolar traballaron diferentes formas de violencia presentes na vida cotiá desde as relacións persoais no ámbito da escola, pasando polas relacións sentimentais na adolescencia ou a mesma trata de persoas que afecta a millóns de nenos, nenas e mulleres no mundo. É fácil posicionarse contra a violencia extrema, contra un asasinato… mais é nos estadios previos onde a educación pode facer a diferenza e contribuir para a súa erradicación.

As sesións de club de lectura xiraron arredor dos seguintes títulos: Unha estrela no vento de Ledicia Costas, As cousas claras de Neira Cruz e a Lección de August de R. J. Palacio

Velaquí a actividade do noso alumnado no blog do Club de Lectura Arao:

https://clublecturaarao.blogspot.com/2020/10/la-leccion-de-august.html

https://clublecturaarao.blogspot.com/2020/11/as-cousas-claras.html

https://clublecturaarao.blogspot.com/2020/11/unha-estrela-no-vento.html

Reflexionando sobre a violencia de xénero

   

Un grupo de rapaces de 3º ESO e 4º ESO coordinados por excompañeiros do centro (Silvia Lijó e Emilio Roca) e apoiados pola educadora familiar dos Servizos Sociais do Concello de Camariñas (Ali Trillo), o orientador do centro (José Rodríguez) e a biblioteca, fixeron unha reflexión sobre a violencia de xénero neste ano 2020.

Neste vídeo poderedes ver o traballo realizado.

Inicio de club de lectura baixo o sol!

 

Neste mes de novembro inauguramos a primeira sesión dos nosos clubs de lectura. Serán sesións diferentes ás que estamos acostumadas porque a pandemia vai marcar un novo xogo mais aquí estamos. Dispostas a superar a situación!

Esperan por nós novas lecturas e alumnado que continúa ou se incorpora para compartir ideas sobre historias, impresións e opinións sobre temas moi diversos… E se chove, que chova! Agora, se o sol acompaña, o patio é noso!

Se quixeras ver como se desenvolveu esta sesión tan primaveral, preme AQUÍ.