Unha guía para a biblioteca: formación de usuari@s

Arrancamos o segundo trimestre coas sesións de formación de usuari@s para o alumnado de 1º ESO. Coñecer o espazo da bilbioteca e comprender con que lóxica organizamos os nosos fondos, é útil para ser capaz de encontrar eses libros que che apetece ler ou que che fan falta para os traballos das materias.

Desde a biblioteca disponibilizamos un breve caderno de traballo coas claves para entender como funcionamos aquí dentro e para que, de xeito lúdico, o alumnado o aprenda.

Aquí algunhas das fotos da experiencia!

Os materiais                                              Un alumno a deseñar a CDU

      

Relatos con premio!

Escribir ao xeito ten premio na nosa biblioteca! Vai alá un mes desde que lanzamos o certame de relato curto polo Día Internacional dos Dereitos Humanos, e a pesar das dificultades das últimas semanas por causa da Covid, o noso alumnado animouse a crear varios relatos coa axuda do profesorado de linguas. Desde o dereito a vivir en paz, pasando polo acceso a educación ou a emigrar na procura dunha vida digna, os textos recibidos foron un pretexto para pararse a pensar e decatarse de que o lugar de nacemento pode condicionar a vida dunha persoa. A reflexión está feita e o certame xa ten gañador e gañadora. Velaquí o alumnado afortunado:

Categoría A (1º e 2º ESO): Marcos González

Categoría B (3º e 4º ESO): Paula Carril

Parabéns! Que disfrutedes do voso premio no comercio local de Camariñas! 

"Aos quatro ventos" Leitura Expansiva Intercentros

Como vén sendo habitual, a Biblioteca Escolar colabora co ENDLG, Equipo de Normalización e Dinamización da Lingua Galega, en traballos educativos arredor do día das Letras Galegas. Nesta ocasión, por causa da Covid19, foi difícil celebralo como era costume. Con todo, desde o IES Pedra da Aguia, sumámonos á última iniciativa escolar do ano Carvalho participando nun proxecto intercentros promovido desde os institutos do Milladoiro e Burela. A idea foi ler fragmentos dos múltiples xéneros cultivados polo autor, que apostou na ortografía reintegrada para o galego que falamos, abrindo as súas posibilidades comunicativas a toda a Lusofonía.

O noso alumnado púxolle voz a poemas como Sabela, contundencia a textos de A xente da Barreira, a que foi a primeira novela galega da posguerra, e moita solvencia a fragmentos do Scórpio que deron para falar un pouco sobre a nosa lingua.

Se premes AQUÍ poderás ver e escoitar o resultado do noso contributo a este proxecto colectivo.

Parabéns polas boas lecturas e participación!

     

Lecturas demoradas para alumnado rápido!

Tes probado a ler as lecturas recomendadas nas materias de Galego e Castelán con tempo? Non esperes ao final e lembra que as vacacións poden ser un bo momento para levares estes e outros titulos a casa. Ler con calma presta máis!

Na Biblio dispoñemos de exemplares suficientes e unha outra opción pode ser a través da plataforma GaliciaLe. Só precisas asociarte á Biblioteca Municipal para obter o teu carné alí tamén! Despois, é tan fácil como acceder e descargar o título que desexes en formato dixital.

Das lecturas programadas para a 2ª avaliación, encontrarás as seguintes en Lingua Galega:

1º ESO: O neno inverno de María Canosa

2ºESO: Escarlatina, a cociñeira defunta de Ledicia Costas

4ºESO: A cabeza de Medusa de Marilar Aleixandre

... E en Lingua Castelá:

3ºESO: El Conde Lucanor de Don Juan Manuel (Nota: non é a versión escolar)

4ºESO: Don Juan Tenorio de J. Zorrilla  (Nota: non é a versión escolar)

Unha biblioteca nunha mochila! As mochilas viaxeiras

Seis son as mochilas viaxeiras preparadas para pasar o nadal nas casas do noso alumnado de 1ºe 2ºESO. Desta volta serán máis de quince días para disfrutar en familia dunha escolla de filmes, documentais, poesía, literatura multilingüe, atlas e moito contido de artes variadas e coñecemento interesantísimo! Difícil será que nas vosas casas non encontredes algún título do voso gusto... 

Lembrade a enquisa que vai no interior para seguir mellorando os fondos da nosa Biblioteca Escolar e non esquezades tirar moitas fotos dos mellores momentos da experiencia coa que montaremos unha reportaxe. Fainos moita ilusión!

E para os que non fostes rápid@s abondo, habilitaremos novas quendas quincenais á volta das vacacións!  

Inscríbete na biblio!