Celebramos o día do libro!

Este ano celebramos o 23 de abril na nosa biblioteca axustando a programación dos nosos clubs de lectura con títulos en banda deseñada, para animar ao noso alumnado a ler tamén neste medio. Neste sentido, ao longo do mes, as sesións de encontro fixeron fincapé nas posibilidades deste formato que nos permite tratar calquera tema dun xeito atractivo. Por outro lado, e xa no mesmo día 23 de abril, preparamos un mesado de novas propostas de títulos cunha escolma dos fondos adquiridos nas últimas semanas. Que tañades boas lecturas! E...Feliz día do libro!

 

Abril, o mes do libro... en banda deseñada!

 

Durante este mes de abril, os nosos clubs de lectura desenvolveron a súa actividade coa ollada posta no vindeiro día do libro, o 23 de abril. Tratándose de grupos familiarizados coa lectura, pareceunos oportuno destinar a programación do mes á banda deseñada, da que a nosa biblioteca ten un pequeno fondo con visos á súa ampliación. Os títulos escollidos deron a oportunidade a algún alumnado de ter unha primeira experiencia co medio, ben porque nunca antes experimentaran coa lectura de cómic ben porque só coñecían o manga. Durante as sesións puideron comprobar que a banda deseñada é un medio moi atractivo e artístico para abordar calquera tema que se nos ocorra.

 

No club de 1ºESO escollimos A proba de Auga de Anémona de Río:

https://clublecturaarao.blogspot.com/2021/05/a-proba-de-auga.html

No club de 2ºESO, traballamos con O derradeiro libro de Emma Olsen baseado na novela de Berta Dávila e ilustrado por Pablo Prado:

https://clublecturaarao.blogspot.com/2021/05/o-derradeiro-libro-de-emma-olsen.html

E co club de 3ºESO, a obra escollida foi Matar un ruiseñor ilustrado por Fred Fordham baseado na novela de Harper Lee:

https://clublecturaarao.blogspot.com/2021/05/matar-un-ruisenor.html

Encontro online do club de lectura de adult@s con Eva Mejuto

O noso club de lectura de adultos organizou un encontro online coa autora Eva Mejuto para conversar sobre o libro Memoria do Silencio. Unha hora e media deu para falar sobre moitos detalles do seu traballo e, pouco a pouco, a autora foi debullando algúns aspectos do libro e da súa elaboración, diferenciando as persoas reais, históricas, dos personaxes de fición, as motiviacións para elaborar o texto, os seus potenciais destinatarios, etc. Falamos tamén da importancia de recuperar figuras como as das protagonistas do relato, que son a auténtica historia e que tanta veces pasan desapercibidas e quedamos apenas con visións alleas como as ofrecidas polo cinema americano, por exemplo. Tamén foi destacada a importancia de que xente nova coñeza esta parte da historia, do valor da lectura e da conversa en si mesma.

Falar desta novela breve transportou aos participantes ás rúas de Ribadavia e á historia que desprenden

En fin, un encontro moi aproveitado no que con certeza tanto Eva Mejuto, como os lectores e lectoras, aprenderon moito.

 

 

Encontro literario con María Lado, poesía para acabarmos o mes

Este mércores 24 de marzo gozamos coa visita de María Lado, a través dun obradoiro de creación poética, que organizou a Biblioteca Escolar no marco do programa Encuentros Literarios promovido polo Ministerio de Cultura y Deporte.

 

A poeta da Costa da Morte, que fai parte do actual e puxante panorama poético galego, falounos do oficio de poeta e narradora, da súa traxectoria e da creatividade literaria. Na segunda parte do encontro, a través dun recurso dadaísta, o grupo participante de 3ºESO, foi compoñendo un poema colectivo sobre a temática eterna: o amor. Con moita picardía e non menos romanticismo, crearon un novo poema a partir de versos alleos. Ao grupo e á poeta non lle faltaron humor e lirismo nunha das poucas actividades presenciais que organizamos este curso a causa da Covid.

A experiencia xerou algúns materiais durante o proceso: un padlet de videopoesia de poetas actuais e unha publicación dixital coas creacións poéticas realizadas nas aulas de Lingua Galega e Castelán, departamentos que colaboraron activamente coa Biblioteca Escolar. Se sentides curiosidade, premede nos hipervínculos para acceder.

 

 

Marzo, con M de Muller!

Ao longo de todo o ano, aínda que con máis atención durante este mes de marzo, é un bo momento para reflectirmos sobre a que xa é unha das grandes loitas do noso tempo: o feminismo e as identidades.

Desde os nosos clubs non quixemos ficar á marxe e programamos unha ristra de lecturas sobre os temas en discusión.  Ao nivel que puidemos, case sempre enriquecido pola visión do alumnado que coñece sorprendentemente ben conceptos arredor deste movemento social que non esperabamos, usamos como pretexto tres historias diferentes na superficie mais moi próximas no fondo, para falarmos do esencial, do dereito a ser e do dereito a ser respectado. Un básico das reivindicacións!

Foi unha gozada poñer en práctica un par de dinámicas e sentir do noso alumnado un discurso tolerante, capaz de dar resposta ás actitudes máis excluíntes coas que tamén convivimos.

Hai esperanza para este gran desafío incluído na Axenda 2030 co número 5: a igualdade!

 

No club de 1ºESO escollimos 22 Segundo de Eva Mejuto:

https://clublecturaarao.blogspot.com/2021/03/22-segundos.html

 

No club de 2ºESO, traballamos con Mamá, quero ser Ziggy Sturdust de Iria Misa:

https://clublecturaarao.blogspot.com/2021/03/mama-quero-ser-ziggy-sturdust.html

 

E co club de 3ºESO, a obra escollida foi A casa de Mango Street:

https://clublecturaarao.blogspot.com/2021/03/a-casa-de-mango-street.html