Cantando pola Paz
Que gustazo! Ver a tanta xente no hall do instituto cantando xuntos pola Paz. Haille que dar as grazas ás que traballaron este tema e contribuíron á celebración. Estou certo que o ceo azul que temos esta mañá é debido aos cánticos de onte. PAZ


Día escolar da Paz from Libraco on Vimeo.

CONSPIRACIÓN POLA PAZ

As Bibliotecas Escolares xúntanse a conspirar pola Paz, e fan cousas tan fermosas coma esta:

• PAZ?????????????
• PAZ: PAM!. Balas. Confusión, asasinatos, bombas.
• PAZ: PAF!. Golpes. Cambadelas da vida cotiá. Rancor. Violencia.
• PAZ: PAZZZZZZZZZZZZZZZZZZZZZZZZZZZZZ. Soño. Sono indiferente da irresponsabilidade.
• Non é un xogo. É a fraxilidade da palabra. Espello fiel da inestabilidade do seu significado.
• Utopía imposíbel.
• Palabra que xera poesía.
• Poesía? Poesía e Paz.



Esta é a nosa proposta: un mundo reinado pola esperanza das palabras, palabras sublimes que permiten melodías, risos, soños... PAZ.

Xesto simbólico o das Bibliotecas Escolares, que novamente unen voces, azos e esperanzas. A través do mosaico que supón, por fin na nosa comunidade, a integración de diferentes cores, razas, linguas... chega a poesía capaz de expresar unha mesma arela. O frenesí da humanidade dominado pola forza da palabra. Unidos contra a ignominia da morte inxusta, das violacións das mulleres, da violencia extrema, da existencia dos nenos-soldado, da vinganza. Optamos polo silencio das palabras, da súa mudez. Porque a súa música festexe os días de coñecemento. Porque os aloumiños que desprenden estas balas sexan quen de recargar o porvir. Porque o nosos pentagramas debuxen as fusas non confusas da ilusión, do mañá cargado de bombas de papel. Papeis que falan de sorrisos, de amores, de xustizas. Papeis convertidos en poesía.

Hoxe, o noso alumnado, dende esas diferenzas que os converten en iguais, transfórmanse en trasnos portadores de equidade. Dende o pasado poético ao presente sonoro, ao futuro harmonioso.

• Tanques de algodón
• Armas de caramelo
• O noso soño
• O noso desexo
• A nosa conspiración.
  
  
  

  Get your own - Open publication

STAND BY ME
Unha boa forma de demostrar que os humanos, das razas, tipos e lugares máis diversos, podemos entendernos moi ben entre nós, é a música, idioma universal. Como exemplo esta canción, o clásico "Stand by me" de Ben E. King (1968), interpretada por músicos da rúa de todas partes do mundo.

Paz e música!


Stand By Me from David Johnson on Vimeo.

ONTE, HOXE
Seguindo co mes da paz, chégannos estas fotos, vía o blog Mesturas (que circulan pola rede, asinadas por Rodolfo Walsh), sobre a situación en Palestina e a actuación do exército de Israel. É unha montaxe con fotos dobres: unha sobre o que sufriron os xudeos durante a II Guerra Mundial e outra do propio exército israelí hoxe en día, na Franxa de Gaza.
Sempre acaban sufrindo os mesmos, os máis débiles e os máis inocentes!

Get your own - Open publication

ESTAMOS POLA PAZ

Hoxe celebrouse en santiago unha manifestación, ben numerosa, a favor do pobo palestino, que está a sufrir unha situación durísima baixo os ataques israelís, totalmente desproporcionados.

Xustamente no club de lectura tivemos unha reunión para falar sobre un libro (O neno do pixama a raias) que fala do sufrimento terrible do pobo xudeo na II Guerra Mundial. Resulta case imposible de crer que logo de pasar o que pasaron estean agora practicamente reproducindo situacións similares cos habitantes da Franxa de Gaza.

Estaría moi ben que estes días, as 'palestinas' que tan de modo están se puxeran tamén para expresar a solidariedade co pobo palestino.

Estamos, ademais, no mes da paz, que ten o seu día o 30 de xaneiro.