PRIMEIRA SESIÓN

Onte na biblio celebramos a primeira sesión de "Cine para Falar". Xuntámonos un grupo grande de pais e nais, alumnos e profes. A biblio non daba para máis, sobre todo cando quixemos poñernos en círculo para poder vernos as caras.
Vimos unha comedia, "Ponte en mi lugar", que deu pé a falar sobre as diferentes visións do mundo que podemos ter adultos e adolescentes.
No seguinte trimestre teremos a segunda sesión, e xa houbo quen deixou preparada a última do ano decindo que habería que celebralo cunha merendiña! (no patio claro, xa sabedes que na biblio...nin se come nin se bebe).
Felicidades, e grazas, ás familias que quixeron vir a compartir esta experiencia con nós. Aquí tedes algunha foto da sesión.

O GRUPO DE ENCONTRO, EN MARCHA

Xa comenzaron as sesións deste curso do Grupo de Encontro e Debate, que reúne a nais, pais, profes e, de cando en vez, fillos e fillas. Coma sempre, a sesión foi do máis participativa e todo o mundo se animou a aportar as súas opinións. Daba xenio ver o 'viva' que estaba a biblio.

Queremos desde a biblioteca darlle a benvida á xente nova que se incorpora este curso, e recordarvos a todos que hai un blog específico deste grupo, no que podedes participar e deixar as vosas opinións e impresións. Chegades a el picando aquí.

DÍA DE
PRESENTACIÓN

Unha das cousas que máis gusto daba hoxe era ver a biblioteca chea de nais e pais, moitos deles apuntándose ás diferentes actividades que se lles propuxeron durante a presentación anterior.

Preguntas, inquedanzas, interés... medos e preocupacións. Pois claro, normal! Benvidos sexan estos 'temores' que indican que non hai espazo para a indiferencia, o peor dos males. O resto xa se irá axeitando según o curso avance.

De novo, benvidos, e grazas por asistir!

CINE PARA FALAR

Tivemos esta tarde na biblioteca a sesión de cine para falar. Vimos a peli "Quiero ser como Beckham". Igual hoxe en día había que cambiar o nome do futbolista famoso, pero a peli segue a ser igual de válida, e bonita, que hai uns anos.

O mellor foi ver, outra vez, a biblio chea de xente, esta volta con alumnos e con adultos xuntos. E hai que dicir que non falaron só os maiores; os alumnos si que se atreveron a falar e dar a súa opinión. E seguro que seguirán defendendo os seus puntos de vista en futuras ocasións, que estas cousas hai que practicalas. (Preparémonos, adultos!!)

BIBLIOTECA, ESPAZO DE ENCONTRO

A biblioteca do Insti ten moitos usos, e máis que debera ter. Un dos máis importantes é o de servir de espazo común para todos os que forman parte da comunidade educativa do centro. Por iso gustounos tanto que hoxe se celebrara aquí a primeira reunión do Grupo de Encontro e Debate.

Falar, dialogar... é a única forma posible de entendernos entre nós e chegar a sacar de cada un o mellor que poida dar. Longa vida ao Grupo de Encontro!

E esperemos que haxa cada vez máis encontros de todo tipo: de pais, nais, profes, alumnos, alumnas, lectores, non lectores, cinéfilos, non cinéfilos... e o que se vos ocorra. A biblio terá sempre as portas abertas.

Grupo de encontro on PhotoPeach

LECTURA, ESE MILAGRE

Unha foto coma esta pode decir moitas cousas sobre a lectura e os seus milagres (como ben sabe Ana). Pouco importa se non se entenden os debuxos e as letras que poida haber impresas. Importa a relación co libro e cos outros seres humanos. A lectura non só ten unha dimensión informativa, ten unha importantísima dimensión afectiva, como recolle a foto.

Logo, máis tarde, pódenche pasar cos libros cousas estrañas, como lle pasa a este rapaz do vídeo. Onde rematan as historias dos libros e onde comezamos nós?

(Vía "Trafegando Ronseis" a través de Biblioblogs Escolares)

Comeza a viaxe
Xa botaron a andar as Mochilas Viaxeiras deste curso. Coma sempre, comenzamos por primeiro, que hai que ser amables cos que están recén chegados. Os dos demais cursos podedes apuntarvos nas vosas clases ou directamnente na biblioteca.
Xa sabedes que as preparamos para toda a familia e que podedes telas nas casas dous fins de semana seguidos. Os interesados en quedarse con algún dos exemplares que viaxan non teñen máis que avisar á hora da devolución da mochila.
Esperamos que guste a idea nas casas e esperamos recibir moitos comentarios na libreta que vai dentro. Para nós é importante saber as opinións e suxestións dos que reciben a mochila na casa.
que teñan boa viaxe!

PRESENTAMOS A BIBLIO

Como levamos facendo xa uns anos, queremos invitar ao novo alumnado e ás súas familias, a que coñezan a nosa/vosa biblioteca, e a que participen nas actividades conxuntas que propoñemos.

Esperamos que se apunte moita xente e que todos vos atopedes a gusto no centro e na biblioteca. Tamén intentaremos axudarvos, durante os anos que esteades no instituto (e incluso máis) a superar canta dificultade atopedes.

Se queredes ver o contido da carpeta que entregamos na reunión, picade na foto.

BENVIDOS!!

AS LINGUAS SUMAN

Este tríptico informativo foi elaborado pola Coordinadora Galega de Equipos de Normalización e Dinamización Lingüística. Pensamos que pode ser de interese para os pais, para a comunidade educativa e para toda a sociedade en xeral. Nós queremos defender o dereito dereito dos nenos e nenas que educamos a ser igualmente competentes en galego e castelán, segundo se establece no actual Decreto, no que tanto tempo vimos a traballar sen ningún conflito. Pica no tríptico para poder lelo.

CINE PARA FALAR
Hoxe era o día do audiovisual! Pola tarde tivemos unha sesión de cine para nais/pais e fillos. Tedes máis información no blog de Club de Lectura Arao, que non é exactamente o mesmo, pero ten moito que ver.

Mulleres de Camariñas

Coincidindo coa celebración do Día da Muller traballadora, o sábado pola mañán presentouse oficialmente o Consello da Muller da Camariñas, nun acto en Aldea Madeira. Nace este Consello coa idea de recoller o sentir das mulleres do Concello e poder trasladalo ás persoas que teñen a autoridade e o poder de actuar. Xa sabemos dende hai tempo que as mulleres de Camariñas están tirando forte. Queremos dicirlles dende aquí que non están soas tirando do carro.

Ao remate do acto os alumnos da Escola de Hostelería de Aldea Madeira serviron uns pinchos elaborados por homes que realizaron o curso de cociña organizado pola Área de Igualdade do concello.

Ademais presentouse tamén o Banco de Tempo, para o intercambio de servizos e/ou habilidades entre os cidadáns.

BIBLIOTECA E FAMILIAS
Onte pola tarde, aproveitando as reunións de titoría de 1º e 2º, mantivemos un encontro coas familias do alumnado novo, de 1º da ESO, na biblioteca. Nesta xuntanza entregámoslles unha carpetiña con información sobre a biblioteca e sobre o centro, así como unha carta na que se lles informaba das actividades previstas para realizar en conxunto e ás que voluntariamente se podían apuntar: Clubs de Lectura Arao, Lendo a Pares, Cine para Falar e Mochilas Viaxeiras. Tamén lles recordamos que a Biblioteca está aberta a toda a comunidade educativa, e que poden vir a visitarnos os xoves pola tarde; estaremos encantados de recibilos.
Podedes ver o material entregado picando aquí, ou na nova sección Biblio e Familias, que atoparedes na barra lateral do blog.
Esperemos que estas iniciativas teñan boa acollida e este curso sexamos aínda máis a participar nestas actividades conxuntas.

AS MOCHILAS VIAXEIRAS

Co comezo das vacacións comezaron tamén as andanzas dunhas mochilas, viaxeiras, que teñen o estraño gusto de ir de casa en casa, levando no seu interior unhas mostras dos materiais que a biblioteca pode ofrecer ao alumnado e ás súas familias.
Trátase de favorecer a lectura entre o alumnado e nas familias do alumnado. Queremos favorecer os hábitos de lectura e intentar que todos disfruten deste pracer e tamén, por que non, do pracer de falar do lido e do visto. Queremos que pais e fillos poidan intercambiar os pareceres, as opinións, as ideas e os sentimentos que estas lecturas poidan producir. Non podemos, nin queremos, esquecer que gran parte da nosa futura personalidade moldéase dependendo das lecturas que fagamos.

Doutra banda, as mochilas viaxeiras son unha forma de facer visible a biblioteca fóra do instituto e de animar ás familias a usar os seus servicios.

Boa viaxe!!

Nacen ARAOS na Biblio

Todos sabemos o escasos que andan os Araos; xa había poucos e logo do noso "querido" Prestige están practicamente extinguidos.

Pois o caso é que como todos din que os lectores tamén estamos a punto de extinción, nós tivemos un nacemento dobre na Biblio: dous clubes de lectura (un de alumnos e outro de adultos) e chamámoslle "Club de Lectura Arao"... e confiamos en non extinguirnos e seguir viviños e coleando moitos anos!!

Fixémolo aínda máis difícil, porque algúns van a "ler a pares" porque os adultos do club, con fillos no insti, van a ler o mesmo libro que eles/as.

Como regalo polo nacemento dobre teremos unha nova sección no blog, co nome do club, onde publicar as nosas opinións sobre as lecturas que vaimos facendo. Ben por Nós!!!

Presentamos a Biblioteca

Este xoves pasado tivo lugar no Instituto a reunión inicial do curso coas nais e pais de 1º e 2º niveis da ESO. Nesta reunión aproveitamos para presentar a biblioteca, dando a coñecer algunhas das actividades que realizamos ao longo do curso e os obxectivos que perseguimos.

Un punto moi importante foi facerlles a invitación a participar na actividade "Lendo a pares" para que compartan as lecturas dos seus fillos/as. Esperamos que se animen moitos/as.

Repatimos unha carpetiña cos datos máis importantes e cun resumo do labor da biblioteca, para que teñan onde gardar as notificacións que reciban do Instituto.

Aproveitamos a ocasión para invitalos a visitar a biblioteca e facer uso dos seus servizos, (invitación que reiteramos dende aquí), e tamén para recordarlles que está aberta ao público os xoves pola tarde.