MÚSICA X 3

Estes días de "fin de ano" andamos do máis musical no instituto. Algo de "culpa" desto debe de ter Charo... O caso é que levamos xa a música por triple, primeiro coa Orquesta de Corda do Conservatorio de Lalín, que nos ofreceu un recital en Vimianzo, onde houbo ocasión de atoparse con varios 'ex' do Pedra da Aguia, logo na 'Coru', nun ensaio da Sinfónica de Galicia (OSG) e por último no festival de Nadal do insti no que tivemos o pracer de escoitar e ver a algúns dos alumnos actuais e tamén a algúns 'ex' de hai uns anos, como o caso de Alberto, que nos trouxo ao seu grupo "Os druídas da rolda" e que soaron realmente ben, sobre todo se temos en conta que levan pouco tempo xuntos. Aquí debaixo podedes ver algunha imaxe do que conto, e o vídeo picando nesta foto.

BO NADAL A TODOS!!

NO ÁRTICO CON ALBA

Hoxe estivemos no Insti a menos 40º  e con ventos de 180 Kms por hora, pelexando con osos polares e nadando coas baleas azuis...

Ben, non, pero case!! Estivemos charlando con Alba Aguión, recén chegada do Ártico e que nos contou a súa experiencia, o que estivo estudando alí e como chegou a meterse nun proxecto tan interesante. Unha experiencia estupenda, para ela e para nós, xa que puidemos ver que as cousas que queremos pódense conseguir con traballo e esforzo. Tamén puidemos comprobar como traballar na clase pode dar lugar a encontros tan interesantes como este: sen traballar no blog de Naturais non tería habido contacto con Alba. Que se repita! Ah, e seguide os seus consellos e non esquezades o esquema do Iceberg:

SOÑANDO CON BERLÍN

   Logo dun comezo de curso un tanto accidentado por culpa do bibliotecario, que é de mala calidade, puideron, por fin, reunirse con libro lido os do club de lectura de 3º e 4º. Falamos sobre "El sueño de Berlín", que parece que enganchou ben a practicamente todas as lectoras. E digo lectoras, e digo ben, porque parece que no xénero masculino, en 3º e 4º, non mola eso da lectura e o único 'el' que tiñamos o ano pasado deixounos. Mágoa! Menos mal que os 'eles' de 2º e os 'eles' de 1º veñen pegando forte e están moi igualados coas 'elas'. Que sigan así!

Por outra banda "disque" algunha xente do club está a preparar algunha sorpresiña para colgar na rede. Esperamos con impaciencia!

Morre NEIRA VILAS, o pai do Balbino

O pasado venres morreu na súa casa de Grés (Vila de Cruces), aos 87 anos de idade, Xosé Neira Vilas, autor entre outros moitos libros de "Memorias dun neno labrego". Este libro, editado en Bos Aires en 1961, foi unha das primeiras lecturas en galego para moitos nenos e nenas.

Os lectores galegos quedamos orfos dun dos nosos máis apreciados escritores. Por todo, moitas grazas, Xosé. 

 
Xosé Neira Vilas naceu en 1928 en Grés (Vila de Cruces), Pontevedra. En 1949 emigrou a Bos Aires, onde desempeñou traballos diversos traballos e desenvolveu unha intensa actividade en defensa da cultura galega. Casou en 1957 coa escritora cubana Anisia Miranda. Xuntos fundan "Follas Novas" para difundir o libro galego en América. Publicou en 1960 o poemario Dende lonxe, e en 1961 a novela Memorias dun neno labrego. Nese mesmo ano van residir a Cuba. Traballa na Administración e fai xornalismo literario. Nos trinta e un anos que viviu en Cuba escribiu a maior parte da súa obra literaria. Volveu con Anisia a Grés, onde preside a Fundación cultural Xosé Neira Vilas.Membro numerario da Real Academia Galega, recibiu numerosos premios.Parte da súa obra foi traducida a outras linguas.

Así empeza Memorias dun neno labrego:

SEMPRE VIVAS

Hoxe, para lembrar este 25 de novembro, Día contra a Violencia de Xénero, xuntámonos rapaces e rapazas do centro de Primaria de Camariñas, de A Ponte do Porto e do noso Instituto para ler, diante do Concello e co seu patrocinio, un comunicado conxunto deixando claro que este tipo de xente non ten cabida nunha sociedade moderna e igualitaria.

Rematada a lectura do comunicado o Alcalde axudou a Oumaima, a gañadora do concurso de carteis, a facer a primeira pegada do mesmo na fachada da Casa Consistorial, seguida logo por outras rapazas e rapaces que completaron a pegada. Algo máis tarde Oumaima tivo unha intervención estupenda en Radio Nordés, que podedes oír aquí.

CONTRA A VIOLENCIA DE XÉNERO

Precioso cartel saído do traballo nas aulas relacionado co día contra a violencia de xénero. Parabéns! Efectivamente, querémolas como as flores: Sempre Vivas.
E moi interesantes os puntos de vista sobre a igualdade nos Encontros de Pais/Nais de hoxe na biblio do centro. Un tema que parece que xa está "falado" e no que vemos como caen (caemos) cada día en desigualdades, cando non en violencia directamente. Non hai máis que ver o que leva pasado este ano e o número de mulleres mortas.
Pero temos que meter nas nosas cabezas que a violencia de xénero non existe unicamente cando apaecen as noticias nos xornais, empeza moito antes, con actitudes que parecen máis "inofensivas", máis "pasables" e que xustificamos con falsas razóns: "e que me quere moito, me controla porque me quere...". Nunca se debe pasar por aí, hai que cortalo ao primeiro indicio. Hai cousas que un macho fai, un home non.

NON HAI PARADA!

Case nin baixaron do coche que os traía de facer as rutas científico-artístico-literarias e os de 2º volveron subir a outro coche (noviño, oiga, un mes de uso) para irse a Santiago a comerse uns entremeses. Ben, máis ben para ver representados uns Entremeses, "El retablo de las maravillas" e "La cueva de Salamanca", escritos por un tal Cervantes (non sei se vos soa) hai xa uns cantos anos.

Cando menos desta volta foron boíños e levaron con eles a un lote de xente de 1º. En total xuntamos 80 alumnos/as coa paciencia de 5 profes, valentes onde os haxa. Pasámolo ben e ningún rematou na comisaría, así que... todos contentos! (agás os tímpanos dos profes do bus de 1º) En canto estean preparadas colgaremos aquí unhas cantas fotos da excursión. Atentos ás súas pantallas!
E como o prometido é débeda... tachaaaán!

Entremeses Santiago 11/15 - Kizoa Movie Maker

BO COMENZO

Este ano tivo mun arranque un tanto "lento" para este encargado da biblioteca e agora resulta que, en canto me incorporo ás clases van as clases e marchan!!

Que ben! Medio 2º está de ruta científico-artística-literaria por terras da Meseta, creo que buscando un lugar da Mancha... E todo parece indicar que ademais e pasalo ben están aproveitando moito a viaxe. Pena que ningún tivera un sitio na maleta para meterme de polizón!

Teñen un blog no que van contando algunha das cousas que fan e colgando algunha foto. Podedes velo aquí, ou picando no mapa que tedes na columna a dereita deste blog.

Pasadeo ben!

MARCHANDO!

Marchando para a praia e marchando para casa, que isto, por este ano, remata! Parece mentira pero é certo: xa estamos a fin de curso! E penso eu que foi un bo curso. Polo menos eu paseino ben, con xente estupenda (si, a pesar das broncas, si) e seguro que vós tamén. Unha marchiña coma esta (na que algún/nha recordou que tiña pernas para andar, que xa case o tiña olvidado...) é unha boa forma de despedida. É un xeito estupendo de atoparnos uns aos outros sen deberes polo medio, sen traballos que entregar, sen saídas ao encerado, sen ter que facer presentacións diante dos outros... a que si! Pois veña, que as festas están esperando por vós e o sol e a praia tamén. Ah, e tamén ese libro que non puidechedes ler antes e que tamén espera.

BO VERÁN A TODOS!!

Marcha fin curso 14-15 - Kizoa Movie Maker

ILLA de SAN SIMÓN

Unha illa pequena cunha historia moi grande! Fomos saber algo máis dela os dous clubs de lectura do instituto. Fomos acompañando a "Sara" en busca do anel que alí deixara o seu tío na época na que a illa funcionou como cárcere. Fomos buscando a luz que fixera fuxir as "noites  de voraces sombras". E algunha sombra atopamos, que a néboa e o vento non quixeron deixarnos disfrutar plenamente do paseo en barco. Pero aínda así atopamos algunha que outra sorpresa: canóns de barcos afundidos, camarotes de capitáns de galeóns, cofres cheos de  moedas... de chocolate! E para remate do día, comida, piscina e praia en Samil que non todo vai ser literatura, non si? Unha boa despedida para todos (case) os lectores e lectoras do club, co desexo de que teñan un verán cheo de historias bonitas. Outras xa as atoparemos o vindeiro curso metidas entre páxinas! E ás que se van... xa saben que as portas do club seguen abertas. Vémonos!

GOODBYE, SARAH

Hoxe mesmo Sarah dixo adiós! A pesar de saber que remataba o seu traballo aquí colleunos un tanto por sorpresa, pode que por ser a metade da semana. Despediuse botando unha man coas traducións para o  traballo sobre a música e invitando a galletas con sabor americano dos USA: manteiga de cacahuete, como non!

Os que tivemos ocasión fixemos a foto con ela, para quedarnos un recordo seu e que levara o noso.

Farewell, Sarah. Chegou o tempo de cambiar, de probar cousas novas. Que teñas boa viaxe no avión e mellor aínda na vida.

Sarah Sherman - Kizoa Movie Maker

Pancakes & Crepes

Non só de libros vive o alumno. Nin moito menos de exames! Parece que tanto Sarah como Mª José entendérono ben e mostráronse dispostas a alimentar ao alumnado. Contaron coa axuda de "espontáneos", como se ve nas fotos, e con algún/nha alumna (e/ou mamá) dispostos a botar unha man. Foi unha boa forma de gastar os "dolares" conseguidos estes días nas clases de inglés, aínda que máis dun conseguiu saír de alí ben alimentado e sen ter que "afloxar a mosca". E que tal si o próximo ampliamos o mapa e facemos unha xornada gastronómica internacional? Eu apúntome!

CABRAS BOBAS e COCORICOS

 Non, as da foto non son nin as Cabras bobas nin os Cocoricos, son as do club de lectura de 3º e 4º que hoxe tiveron a valentía de poñerse diante de tres clases, tres, de rapaces e rapazas de Infantil dos coles de Camariñas e da Ponte do Porto, para contarlles as aventuras de Miguel e a súa cabra boba (que anda subida polos tellados) e as do pitiño Cocorico, que case, case, desaparece na boca do gato peludo (por comellón). Unha experiencia estupenda para nós e tamén para os "ananos", que polas caras que poñen parece que o pasaron ben. Graciñas ás chicas do club (que xa saben que as quero mal) e ao profesorado dos coles de primaria, que nos facilitaron a vida todo o posible. En breve colgaremos algún vídeo pero mentres aquí quedan unhas fotos de testemuña. Repetiremos outro ano??

Contacontos 14/15 - Kizoa Movie Maker

CONCURSO FOTOGRÁFICO

Xa temos aquí de novo o concurso fotográfico "Ollando Lecturas". Este ano coa novidade de que xa podemos usar Instagram para participar (#ollandolecturas15), aínda que por suposto podedes seguir enviando fotos por correo electrónico:(biblioteca.ies.pedradaaguia@gmail.com)

 Están invitados a participar todos os centros do Concello de Camariñas, desde Educación Infantil a Secundaria. Aquí debaixo déixovos as bases, que tamén podedes atopar escaneando co móbil o código na esquina dereita do cartel. Seguro que aparecen moitos artistas da fotografía:

ESCAQUES VIII

Xa rematamos esta nova edición do Torneo Escaques, e xa van 8, e xa temos de novo un campeón, aínda que repetido. Javier Baña gañou de novo este ano, igual que fixo no último torneo. Debe ser cousa de familia, porque o seu irmán xa ganaba tamén cando estaba no Instituto! Noraboa!

A verdade é que a Javier non lle foi tan fácil. Foi un torneo bastante reñido e durante moito tempo houbo empate na cabeza da puntuación. Os de 1º non gañaron, pero aprenderon moito e seguramente darán moita guerra nas seguintes batallas. Tamén este ano tivemos máis "damas" xogando que outras veces, o que sempre é unha alegría. Esto propiciou algunhas batallas con non sabemos ben que "consecuencias", como a que podedes ver na foto de aquí debaixo.

En fin, que nos vemos de novo o próximo curso. Ide afiando as espadas, digo, as ideas! 

REGRESO AO PASADO

Grazas ao libro "A fraternidade de Eihwaz" de César Mallorquí os do club de lectura de 3º-4º tivemos a oportunidade de  retroceder no tempo este martes pola tarde. Primeiro demos un saltiño de nada, un par de miles de anos, para visitar o Castro de Borneiro, e logo outro saltiño máis, un pouco máis longo (uns mil e pico anos máis, ou así) para visitar o Dolmen de Dombate, señor dos dolmens galegos que últimamente, pese a súa avanzada idade, consérvase moi ben. Queremos darlle as grazas ao profesorado que nos cedeu as súas clases para poder facer esta viaxiña. Foi ben aproveitada.

PETANDO NA PORTA

Hoxe petounos na porta da biblioteca Xabier Docampo.

Entre as 3  e as 5:30 da tarde, Xabier someteuse ao interrogatorio (3º grao) dos lectores e lectoras do club de 1º e 2º, que  o acribillaron a preguntas e comentarios de todo tipo, e que el tivo a pacencia e vontade de contestar unha a unha. Non contento con isto, apagamos todas as luces de biblioteca e, á luz das velas, regalounos dous contos de misterio, contados ao xeito no que se contaban antes, ao calor do lume, con todos os rapaces calados coma petos. Logo disto e dalgunhas preguntas máis, rematou firmando exemplares e deixándose fotografar con cantos quixeron. Unha tarde estupenda en compaña dun gran escritor e defensor do noso, e dun amigo. Grazas, Xabier. Volve cando queiras!

Petando na porta - Kizoa Movie Maker

ENTROIDO 2015

Xa comemos as filloas e as orellas e xa tomamos o cocido! Seguro que moitos volven ás aulas aínda coa perruca na cabeza e o disfrace a medio poñer, ou máis ben a medio quitar. Que se lle vai facer! Hai que tornar á realidade, pero "que nos quiten o bailao"!

E para recordar ese "bailao" nada mellor que ver unhas fotos ou un pequeno vídeo que nos sirva de memoria visual. Coma sempre, e xa van moitas veces este ano, grazas a tod@s por participar, polo bo humor e polo bo ambiente que se viviu na festa. Que siga!

(Música: Falcon 69 - The Easton Ellises)

 M4T3M3S

 Xa rematamos o M4t3m3s. Tivemos que esperar ao duro desenlace, a dura "batalla", entre dous grupos de 4º para ter o resultado final. No primeiro ciclo xa tiñamos un  grupo gañador desde o remate das probas do concurso: Arián, Juan e Martín. No 2º ciclo a "guerra" decantouse do lado de Claudia, Mirian e Thalía, que conseguiron formar a figura dun chinés coas sete pezas do tangram, en menos tempo que o equipo rival!

Foron catro semanas de facer números, usar a lóxica para atopar respostas, practicar o control espacial e máis cousas que tiveron aos participantes (bravo por eles/as) ben "enrollados" para conseguir a máxima puntuación posible. Visto o resultado, teredes que convencer a Rosana e demais compoñentes do equipo de biblio para que repita o concurso o ano próximo!!

Felicidades campións e felicidades a todos os participantes.

De POESÍA, CRIMES e OUTRAS HERBAS

 Pois así pasa no club de lectura e así pasa cos lectores, podemos saborear, degustar calmosamente a poesía e, acto seguido, mergullarnos nos crimes máis tremendos sen despeinarnos! Vantaxes de ser lector! Claro que realmente non foi un paso tan brusco, xa que os crimes viñan asinados por poemas, nin maís nin menos que da nosa Rosalía...

Estupenda sesión do club de lectura na compaña de Pedro Feijoo e a súa A memoria da choiva. Contounos, preguntámoslle, desvelou algún que outro segredo, mostrounos os apuntamentos (a man) do precociñado da novela... e deixounos con gañas de máis. Queda emplazado, xa o sabe el, para a súa seguinte novela que, segundo nos desvelou, anda xa a piques de entrar no forno.  O faro Vilán, un lugar perfecto para facer unha presentación da mesma. Non si, editores?

TEMPO DE POEMAS

Esta tarde tivemos tempo para a poesía. Tivemos tempo para a charla, tempo para o intercambio, tempo para opinar, para diferir, para acordar, para os sentimentos, para os sentidos.

Foi un pracer ter conosco, co Club Arao, a Juan Besada e o seu xeito de mirar a vida, de mirar as persoas, co seu ir, co seu pararse, co seu dicir e escoitar e o seu volver de novo, para non perderse nada, para non pasar páxina antes de ter disfrutado de cada momento, de cada sensación.

Poesía de proximidade, carnal, etérea. Na que identificarte, que te identifica. Mundos paralelos que, non obstante, te explican. Literatura.

 Grazas, Juan, e grazas aos membros do club que sempre conseguen sorprenderme, a pesar do tempo compartido, coa súa sensibilidade e a súa capacidade de acollida. O dito: un pracer.

MY ENGLISH FRIENDS

Alá fomos, buscar aos nosos amigos ingleses. Atopámolos en Santiago, nun escenario teatral. E polo que me contan parece que o persoal pasouno ben e ademais, sorpresa, moita xente entendeu moito do que alí se falaba.

A verdade é que hai que felicitar ao alumnado que nos acompañou, que demostraron unha vez máis que saben comportarse (cando queren) como debe ser e sempre mellor que outros centros que por alí andan. Tamén hai que agradecerllo aos "pastores" do "rabaño de cabras" (éramos máis de cen!!) que se brindaron a acompañarnos. O único que nos sobrou foi algo de chuvia, que a collemos toda. Non podía faltar a comida e as compras, como non, no centro comercial. Habería vida antes dos centros comerciais!! Eu teño as miñas dúbidas! As fotos, ao completo, xa sabedes onde.

My English Friends - Kizoa Movie Maker